У наступным годзе Еўрасаюз хоча ўнесці істотныя змены ва ўмовы працы. Змены датычацца дапушчальнага часу працы. Замест 48 гадзін ён можа павялічыцца да 65 гадзін.

Уся Еўропа зараз мае 40-гадзінны працоўны тыдзень. Але на запатрабаванне шэфа працаўнік можа правесці на працы яшчэ дадатковых 8 гадзінаў. Пасля ўводу новых правілаў начальнік можа запатрабаваць ад падначаленага ажно 25 дадатковых гадзінаў працы.

Новыя правілы пэўна прыйдуцца да спадобы будаўнікам, бо будаўнічыя фірмы часта спазняюцца з тэрмінамі здачы аб’ектаў, а таму вымушаны затрымліваць працаўнікоў на працы звыш нормы. Задаволеныя будуць таксама прадпрыемствы, дзейнасць якіх мае выразны сезонны характар.

Аднак у Брусэлі не маюць намераў даваць працадаўцам поўнай улады над працаўнікамі. Падоўжваць гадзіны можна будзе толькі ў адным тыдні. Калі такое адбудзецца, працадаўца мае альбо кампенсаваць потым гэта выходнымі (на 25 гадзінаў атрымліваецца 3 выходных), альбо зменшыць колькасць гадзін ніжэй 40 у наступным тыдні.

(па матэрыялах польскіх СМІ)