Мода на валантарыят дасягнула Польшчы. Да валанцёраў далучаюцца не толькі студэнты, пенсіянеры і беспрацоўныя. Расце колькасць ахвотных сярод супрацоўнікаў фірмаў і банкаў.

Заяўкі на валантарыят звычайна прыходзяць на электронную скрыню фірмы. Кіраўнік аддзела кадраў вывучае яе, а потым звяртаецца да супрацоўнікаў. Заўсёды знаходзяцца некалькі чалавек згодныя выканаць тую ці іншую працу: здаць кроў, даглядзець за дзецьмі, дапамагчы інвалідам.

Супрацоўнікі страхавой фірмы Hestia з Сопату ангажуюцца ў бясплатную працу для фонда Integralia. Яны займаюцца падборам кадраў, даюць юрыдычныя кансультацыі, займаюцца піярам дзейнасці фонда. А раз на месяц усе разам здаюць кроў для хворых дзетак.

“Дзякуючы такой дапамозе мы можам выдаць больш грошай на заняткі для дзяцей-інвалідаў і на падарункі”, - кажа Дар’я Лабадзінская, кіраўнічка фонду Integralia. Для фірмаў, супрацоўнікі якіх займаюцца валанцёрскай дзейнасцю, па-першае, гэта добрая рэклама, па-другое – валантарыят забяспечвае пазытыўнае і станоўчае рэнамэ на рынку сярод кліентаў, што нарэшце павялічвае капіталізацыю кампаніі.

(па матэрыялах польскіх СМІ)