Знакаміты калега Тура Хеердала, Павэл Павэл з правінцыйных паўднёва-чэскіх Страконіц вырашыў парадаваць суграмадзянаў пабудоваю ідала. Каб было не горай, як на востраве Пасхі.

У 1986 г Павэл Павэл, будаўнік па прафесіі і інтуітыўны археолаг з паклікання, бліскуча прадэманстраваў усяму свету развязанне загадкі ідалаў вострава Пасхі. Гіганцкія скульптуры народу мааі, пастаўленыя трачма, выклікалі пытанні нават у самога Хеердала.

Да прыезда на востраў Павала лічылася, што найменшая колькасць людзей, патрэбная для транспартавання скульптураў у 800 тонаў вагою – сотня. Павалу ж удалося перасунуць ідала за дапамогаю усяго 16 тубыльцаў, карыстаючыся пры гэтым адно прымітыўнымі канатамі ды рычагамі.

Нягледзячы на здабытую ў выніку сусветную славу, Павал застаўся страконіцкім патрыётам. Прыдумаў, як ушасцёх паставіць на месца 30-тонны валун з ваколіцаў гораду, выдзерты з месца нейкім вандалам. А пасля – ізноў занурыўся ў экзатычную старажытнасць, давёўшы эксперыментам, што славутую каменную тэрасу ў Баальбэку маглі скласці ўсяго 160 чалавек работнікаў.

Апошні “подзвіг” Павала – ізноў лакальна-патрыятычны. Ён вырабіў 180-кілаграмовую скульптуру дудара, каб прывабіць гасцей да дударскага фестывалю ў гарадку. Але і без тэхнічнага азарту тут не абыйшлося: 3-хметровую скульптуру перасоўвалі ў цэнтр волакам два чалавекі.

(паводле матэрыялу blesk.cz)