Сенсацыйнае адкрыццё балтыйскіх маракоў мае быць асобным радком упісанае ў летапіс расейска-нямецкай дружбы. У расейскім Балтыйску (некалі - Пілаў) нібыта знайшлі рукапісны аркуш, складзены самім Імануілам Кантам.

Легенда кажа, што паперчыну адшукаў у руінах замку ў Балтыйску мясцовы жыхар. Пераклалі яе нямецкі змест – а там пра “чалавека і зорнае неба над ім”. Хто ж яшчэ, як не Кант?

Дырэктар балтыйскага музею Марфлоту рукі на адсячэнне за аўтарства Канта не дае. Але інфармуе, што мясцовыя графолагі з міліцыі кантаў почырк пазналі.

Зрэшты, у Калінінградзе, у былой Катэдры, месціцца цяпер адмысловы музей, прысвечаны “нашаму славутаму земляку” . Маюцца там і аўтэнтычныя рукапісы нямецкага філосафа, так што дадатковая экспертыза знаходцы не зашкодзіць.

(паводле матэрыялу prostir.museum/news/ua)