Еўрапейскі "Грузавік талерантнасці", якому ўлады Вільнюса і Каўнаса адмовілі ў “прытулку”, на цэнтральных плошчах гарадоў, хутчэй за ўсё, будзе спыняцца на прыватнай тэрыторыі гандлёвых цэнтраў.

Акцыя "Грузавік талерантнасці" пачалася яшчэ вясною і з таго часу яна падарожнічае па Еўропе, 20 жніўня акцыя будзе ў Вільнюсе. Грузавік будзе знаходзіцца каля гандлёвага цэнтра "Hyper Rimi", бо арганізатары атрымалі дазвол уладальнікаў сеткі. У Каўнасе грузавік размесціцца ля гандлёвага цэнтра "Molas".

"Мы зробім усё, каб аб акцыі стала вядома шырокай грамадскасці", - сказаў у інтэрв'ю каналу LNK працаўнік прадстаўніцтва Еўрапейскай Камісіі ў Літве Юргіс Вільчынскас.

Аднак раней мэр Вільнюса Ёзас Імбрасас адхіліў просьбу прадстаўніцтва Еўракамісіі ў Літве дазволіць уезд на Ратушны пляц “грузавіка талерантнасці”. Мэр Каўнаса, кансерватар Андрус Купчынскас таксама адзначаў, што раіў падпарадкаваным не выдаваць дазволы на правядзенне мерапрыемства.

(па паведамленнях літоўскіх СМІ)