Канцэрны з Кітая хочуць пабудаваць другую лінію варшаўскага метро за палову цаны, якую прапануюць іспанцы і немцы - сцвярджае міністр спорту Польшчы, спадар Міраслаў Джэвецкі. На яго думку, еўрапейскія фірмы змовіліся, каб як мага больш "наварыць" на Польшчы падчас будаўніцтва метро.

Сустрэча з прадстаўнікамі будаўнічых канцэрнаў з Далёкага Ўсходу адбылася падчас пабыту Джэвецкага ў Пекіне. Кітайцы зацікавіліся інвестыцыямі ў Польшчу - уласна, будаўніцтвам другой лініі метро, па якой варшаўскія ўлады спынілі тэндэр, паколькі заходнія фірмы паспрабавалі скарыстацца спешкай перад Эўра 2012 і замест прадугледжаных каштарысам 2,8 мільярдаў запатрабавалі за сем кіламетраў 6 мільярдаў злотых.

"Кітайцы сказалі, што яны мараць аб тым, каб зрабіць гэта за палову дадзенай сумы", - паведаміў Джэвецкі. Што пра гэта думаюць варшаўскія гарадскія ўлады? "Мы спадзяемся, што гэтым разам кітайскія фірмы выканаюць фармальныя патрабаванні тэндэру. Чым вышэй канкурэнцыя, тым лепш для сталіцы", - адзначыла мэр горада Ганна Гранкевіч- Вальц.

Перамога кітайцаў можа азначаць пачатак захопу польскага рынка, перасцерагаюць эксперты. "Ніхто ў Еўропе раней не дапушчаў кітайцаў да настолькі маштабных інвестыцый", - папярэджвае дырэктар аўстрыйскага Strabag, паляк Дарыюш Слацвінскі. “Гэта можа скончыцца поўным дамінаваннем на рынку. Кітайская будаўнічая махіна спрабуе любым коштам апанаваць еўрапейскі рынак, нават коштам фінансавых страт”, - упэўнены ён.

(па паведамленнях польскіх СМІ)